MAKAMB’OYO ESENGELI LIBOSO MPO NA KOYEKOLA BIBLIA
(Etiami nsika Mokolo na 03 03 2024)

1- Maloba na Ebandeli

Nkolo na Liloba na Ye akebisi biso na oyo Ye moko aponi kobenga "...masolo ya mpamba na bato babebisami na bososoli mpe bajangi bosolo..." 1Timote 6:5.

Atako tobyangami mpo na kosala nyonso mpo na komema Nsango Malamu na Yesu Klisto epai ya bato mpo na kobikisa bango, mpe atako tobengami mpo na kosalela bompikiliki nyonso esengeli mpo na kosalisa bato banso basosola liloba na Nzambe, biso Tobengami na lolenge moko te lobela liloba ya Nzambe. Tosengeli koboya kokweya na motambo oyo basali na satana batielaka biso, na kokela masolo mpo na kososola liloba na Nzambe te, kasi kaka mpo na ko pengwisa likebi na bato, na biso. Tosengeli mpe kokima masolo nyons’oyo ezali ya kolendisa biso te, ejali mpo na kotonga biso te.

2- Mitambo na satana

Lokola Nkolo asi amonisaki biso, tango basali na satana balongi te kokanga biso na mitambo na masumu oyo batieli biso, basalaka makasi na kotia motambo mosusu oyo ya kopengwisa biso, mpo’te tokoka kotala na lobiko na biso te, mpe na mosala na Nzambe. Yango wana tosengeli kokeba mpenja.

Sik’oyo lokola boyebi ete basali na Lifelo balapi ndai ete bakondimaka ata moke te bosolo, mpe sikoyo boyebi ete etinda na bango ejali ya kosala nyonso mpo na kopengwisa yo na nzela ya Nzambe na ntina ya komema yo na Lifelo, yango Ezali na mabongisi oyo esengeli na yo kosala ntango nyons’oyo olingi koyekola elongo na bato na ntina na Biblia.

Tokoki te, na ntina ya basali na satana, kokanga baporte na bat’oyo batunaka biso mituna mpo na kososola malamu Liloba na Nzambe. Kasi lokola tokoki te koyeba yambo nani atunaka mituna mpo na koyekola mpe nani atunaka mpo na koengwisa likebi, tosengeli kozala polele, motema molai, mpe komilengela mpo na koyanola na bolingo mpe na malembe epai na baoyo nyonso balingi koyekola.

Mpo na koboya kokweya na mitambo ya basali ya Satana oyo mosala na bango ezali ya kopengwisa yo mosika na liloba na Nzambe, tala mokona basekele oyo topesi yo. Wana ezali makambo nsambo oyo esengeli kotiama na bato yambokoyekola moko na moko, to yambo na masolo moko na moko, ntango okanisi ete ntembe oyo to lisolo oyo ekoki kobota mwa mbuma.

3- Ba-Biblia ya mangomba (les bibles des sectes)

Ezali na mangomba ya satana oyo, lokola bandimisami ete bakokoka te kolongisa mateya na bango ya lokuta na Biblia Esantu, batindamaki na makasi ete básala Babiblia na bango moko. Ezali bongo mpo na Bakatolike, Batatoli ya Yehova, Ba-mormon mpe mwa bituluku mosusu ya mikemike ya Satana. Ba- katolike basali oyo babengaka "Biblia ya Yelusaleme", to na lopoto babengi "La bible de Jérusalem" mpe "Biblia ya TOB" to na lopoto babengi "La bible TOB". Longola oyo, bazali na mwa bamaniskri mpe mwa babuku mosusu oyo basalelaka mpo na kokosa balandi na bango. Batatoli na Yehova basali oyo babengaka "Libongoli ya Mokili na Sika" To lopoto babengi "La traduction du monde nouveau" Basalelaka mpe mwa babuku ebele mpo na kobungisa etonga na bango nzela. Yango ezali mpe bongo mpo na Ba-mormon, oyo basali oyo babengaka "Buku ya Mormon" to na lopoto babengi "Le livre de mormon".

Osengeli ata moke te kondima ntembe to masolo ya bat’oyo basalelaka ba biblia ya ba sectes to mangomba wana. Mpe soki olingi kosala ntembe na bango, senga batia mpembeni Biblia na bango ya lokuta, mpe banyokwama mpo na kosalela Biblia ya solo na ntango ya lisolo na bino.

Totángi maloba oyo ezali likoló na Biblia ya Katolike ya TOB. Ezali na ntina tóyebisa bino polele ete TOB elimboli na yango ejali: Elimboli ya Biblia mpo na boyokani ya mangomba nyonso, elibongoli oyo esalemi na mokano mpo na kosepelisa mangomba nyonso; libongoli oyo esalemi mpo na koyokanisa bindimeli nyons’oyo ekoki kozala. Bongo awa yeba’te ozali na yango, kindumba ya solo ya Biblia, kindumba ya soni te mpo na Liloba na Nzambe.

4- Makambo Nsambo (7) Oyo Esengeli

Ezala ozali kosala na mangomba oyo tolobeli mwa likoló to na lingomba mosusu oyo tolobeli te, etinda oyo osengeli kosalela ezali ndenge moko. Yambo na kosangana na boyekoli ya Biblia, to lisolo to ntembe na ntina ya Biblia na moto yonso, esengeli liboso boyokana na makambo nsambo (7) oyo elandi liboso mpe esengeli:

1- Bondima ete Biblia nde ezali kaka Liloba na Nzambe.

2- Bondima ete kaka Biblia nde ezali Liloba na Nzambe, elingi koloba ete buku mosusu te, mokanda mosusu te, maniskri mosusu te, ata mpe ndimbola moko te ya Biblia, ezali komonisa Liloba ya Nzambe te.

3- Bondima ete Nzambe azali Mokomi se moko ya Biblia, elingi koloba liloba moko te na Biblia ewutaki na Petelo to Yoane to Paulo, mpe lokola…

4- Boyokana na likambo oyo ete Biblia mobimba epesameli biso, elingi koloba ete nsango ezali te na kati ya Biblia mpo na Bakolinti, to mpo na Baefese, mpe lokola

5- Bondima ete Biblia na solo oyo Nzambe apesaki biso ezali na mikanda 66. Mikanda oyo 66 esengeli kozala na bankombo ya mikanda na Biblia Esantu oyo toyebi, mpe ebongisama na molongo ya mikanda ndenge elakisami na Biblia esantu.

6- Bondima ete Biblia ezali Solo Solo.

7- Bondima ete makambo oyo ekomami te etali biso te.

Esengeli mpenja kotosa makambo nsambo (7) oyo ya liboso soki olingi kosala boyekoli ya Biblia to kokabola na ntina na Biblia, oyo ezali kokumisa Nzambe. Na likambo moko te osengeli kokɔta na ntembe ya Biblia elongo na bat’oyo bawanganaka Bokonzi ya Biblia. Yango ekozala kozanga kotosa Nzambe. Bosengeli soko moke te koleka oyo ekomami, lokola Nkolo atindi biso na eteni oyo uta 1Bakolinto 4:6 " …Mpo na bolamu na bino, mpo ete, na ndakisa na biso, boyekola likambo oyo: Bolekaka mondelo te ya makambo oyo ekomama;…" Yekola kotikala na Biblia, Biblia mobimba mpe kaka Biblia!

Biblia ya solo ezali na mikanda to Buku 66, oyo etángamaki na molɔngɔ oyo:

5- Kondimana na Nkala

Ebandeli, Kobima, Levitike, Mitango, Deteronomi, Jozue, Bilombe, Rite, 1Samuele, 2Samuele, 1Bakonji, 2Bakonji, 1Masolo na Nkala, 2 Masolo na Nkala, Esidrasi, Neyemi, Ester, Yobo, Banjembo, Masese, Mosakoli, Loyembo ya Salomo, Ezayi, Jeremi, Bileli, Ezekieli, Danieli, Oze, Joeli, Amosi, Abidiasi, Yona, Mishe, Naumi, Abakuki, Sofoni, Aje, Zakari, Malashi. Nyonso Buku 39.

6- Kondimana na Sika

Matai, Malako, Luka, Yoana, Misala na Bantoma, Baloma, 1Bakolinto, 2Bakolinto, Bagalatia, Ba-Efeso, Bafilipi, Bakolose, 1Batesalonika, 2 Batesalonika, 1Timote, 2Timote, Tito, Filemono, Ba-Ebre, Jake, 1Petelo, 2 Petelo, 1Yoana, 2 Yoana, 3 Yoana, Jide, Emoniseli. Nyonso Buku 27.

7- Komona

Kasi, nalingi kokundwela bino ete Biblia ya solosolo esengelaki kozala na mateya mpe bimoniseli mingi koleka oyo tozali kokuta na Biblia ya mikanda to buku 66 ya lelo. Kasi satana mpe basali na ye, oyo bazali kobunda etumba na kozanga kotika na liloba na Nzambe, basali nyonso mpo na kosala ete mateya mpe bimoniseli mosusu oyo esengelaki kozwama na Biblia ezwamaki na nsuka kuna te. Yango wana emonisami ete Biblia ya mikanda 66 oyo tozali na yango sikawa ezali ya kokoka te.

Basusu kati na bino bakoki kotuna mpo na nini nazali kotingama ete mateya to malakisa mpe boyekoli na biso ya Biblia etongama bobele na Biblia esantu oyo ezali na buku to mikanda 66 oyo tozali na yango sikawa, nzokande nayebi ete ezali ya kokoka te. Eyano ezali oyo Bolingami:

Ya liboso, soki totongaki mateya mpe boyekoli na biso ya Biblia likoló na bamaniskri oyo ezali na bato nyonso te, mpe oyo tozali kutu na ntembe te ete Nzambe andimi yango, ekozala mpenza likoki te mpo na biso tómiyoka nzinganzinga ya liloba ya Nzambe. Na maloba mosusu, ekozala mpasi mingi mpo na koyeba nani azali mpenza koteya solo mpe nani azali koteya lokuta, to koyeba liteya nini ezali mpenza solo, mpe oyo ezali lokuta.

Na nsima, Nkolo asalaki ete atako mateya mpe bimoniseli oyo satana mpe basali na ye babimisaki na Biblia ezalaki te, makambo na ntina ya oyo tosengeli koyeba mpo na kobika ebatelamaki. Yango wana elakisi ete kozanga mateya mpe bimoniseli oyo satana mpe basali na ye babimisi na Biblia ekoki te kotinda biso tojanga Lola. Nkolo, na bokonji na ye, ajali komibanzabanza mpo na kofuta bojangi to bojangi oyo ya bimoniseli, mpo ete tonyokwama na yango te, mpe mpo ete tozala mpenza na bokatikati te na molimo.

8- Maloba na nsuka

Na yango, balingami, tosengeli kosepela na Biblia oyo ya buku to mikanda 66 oyo tozali na yango sik’oyo, mpo na mateya mpe boyekoli na biso ya Biblia. Biblia oyo, atako ezali ya kokoka te, ezali na makambo mingi oyo tosengeli na yango mpo na koyeba Nzambe, mpe kosalela Ye.

Mosala oyo basali ya satana bazali kosala na kokela ba Biblia na bango moko ezali kaka bokobi ya etumba oyo bato-na-mopanji na satana bajali kosala uta bikeke na bikeke mingi mpo na kobundisa Liloba na Nzambe, kosala nionso oyo bakoki mpo ete solo elimwa mobimba na se na moyi. Likambo ya mawa mpo na basali ya Lifelo, mpe na esengo mpo na biso, Bana na Nzambe, etumba nyonso kobundisa liloba na Nzambe ejali etumelongami uta liboso. Satana mpe basali na ye bakolonga ata moke te kobebisa liloba na Nzambe to kosala ete bosolo elimwa.

Ndenge nayebisaki bino na mateya oyo ya "Bososoli", Solo eko kufaka ata moke te. Liloba na Nzambe ejali Solo, mpe Nzambe alaki kokengela mpe kobatela Liloba na Ye. Baoyo nionso babundisaka Solo bazali lokola kokata njete baobab na rasoir. Ee, bazoba oyo bazali kotoka ebale na kopo to vidér l’océan avec un gobelet. Mpe na bozoba na bango, bandimaka ete mokolo mosusu bakolonga. Alleluia!

Soki Nkolo apesi njela, nakokolisa likambo oyo na bozindo mingi mpo na bino, na liteya mosusu.

Tika eté Ngolu ejala na baye banso balingaka Nkolo na biso Yesu Klisto na boling’oyo ekoki kobongwana té!